មជ្ឈមណ្ឌលអ៊ីហាវសិល្បៈ នឹងក្លាយទៅជាទីតាំងភ្ជាប់ទំនាក់ទំនងវប្បធម៌និងសិល្បៈរវាងប្រជាជនកម្ពុជា-ចិន ព្រោះវប្បធម៌ចិនមានដូចជា ការសរសេរ គូរគំនូរ តែងកំណាព្យ ភ្លេងជាដើម ហើយសម្រាប់វប្បធម៌ខ្មែរ មានដូចជា៖ គំនូរលើប្រាសាទអង្គរវត្ត ការរាំរបាំបុរាណ ដោយអាចជំរុញនិងផ្សារភ្ជាប់វប្បធម៌ទាំងពីរឱ្យកាន់តែមានភាពរីកចម្រើន និងល្អប្រសើរបន្តទៅមុខទៀត ។
ក្នុងពិធីសម្ធោធជាផ្លូវការនៃមជ្ឈមណ្ឌលអ៊ីហាវសិល្បៈ ដែលមានទីតាំងស្ថិតនៅផ្លូវលេខ៣៣៤ សង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ លោក Cao xu dong ប្រធានមជ្ឈ មណ្ឌលអ៊ីហាវសិល្បៈ បានឱ្យដឹងថា ការបង្កើតនូវមជ្ឈមណ្ឌលអ៊ីហាវសិល្បៈ មិនត្រឹមតែជាការនាំមកនូវវប្បធម៌និងសិល្បៈមកកាន់ប្រទេសកម្ពុជាប៉ុណ្ណោះទេ គឺនឹងនាំយកនៅវិចិត្រករពីប្រទេសចិនថ្មីៗបន្ថែមទៀត ដើម្បីបង្ហាញស្នាដៃនៅក្នុងមជ្ឈមណ្ឌលមួយនេះ ។
លោកបានបន្តថា មជ្ឈមណ្ឌលមួយនេះ ក៏អាចមានរៀបចំជាសិក្ខាសាលាទាក់ទងអំពីវប្បធម៌និងសិល្បៈ ដើម្បីជួយជំរុញឱ្យវិចិត្រករជំនាន់មុន ចូលរួមចែករំលែកបទពិសោធន៍ផ្សេងៗ និងទទួលយកនូវគំនិតថ្មីៗពីវិចិត្រករជំនាន់ក្រោយ ដើម្បីបណ្តុះជាគោលគំនិត និងជំរុញការងារមួយនេះឱ្យកាន់តែល្អប្រសើរបន្ថែមទៀត ។
ក្នុងពេលបច្ចុប្បន្ននេះ វប្បធម៌និងសិល្បៈ គឺជាកម្លាំងមួយដែលអាចធ្វើឱ្យប្រជាជន មានភាពស្រស់ ស្រាយ គំនិតភ្លឺស្វាង ដូច្នេះលោកសង្ឃឹមថា មជ្ឈមណ្ឌលនេះ នឹងក្លាយទៅជាទីកន្លែងមួយដែលអាចផ្តល់ភាពរីករាយនិងកក់ក្តៅទៅដល់ប្រជាជននៃប្រទេសទាំងពីរ ។
អ្វីដែលកាន់តែពិសេសនោះ មជ្ឈមណ្ឌលនេះ ក៏មាននៅតាមបណ្ដាប្រទេសផ្សេងៗ ដូចជា៖ ចិន អាមេរិក ម៉ាឡេស៊ី ជាដើម ដូច្នេះ មជ្ឈមណ្ឌលនេះ នឹងប្រមូលផ្ដុំនូវវិចិត្រករនិងអ្នកវិនិយោគ ឱ្យមកបង្ហាញស្នាដៃ ក៏ដូចជាមកបណ្ដាក់ទុនវិនិយោគនៅកម្ពុជា ឱ្យបានកាន់តែច្រើន តាមរយៈការផ្សព្វផ្សាយវប្បធម៌រួមគ្នានេះ ។
ជាចុងក្រោយ លោក Cao xu dong ប្រធានមជ្ឈមណ្ឌលអ៊ីហាវសិល្បៈ សង្ឃឹមថា ក្នុងពេលអនាគតប្រជាជននៃប្រទេសទាំងពីរ នឹងរួមគ្នាជំរុញវប្បធម៌និងសិល្បៈនៃប្រទេសទាំងពីរ កាន់តែរីកចម្រើនបន្តទៅមុខបន្ថែមទៀត ៕ វិទ្យុជាតិកម្ពុជា ៖ លោកស្រី ស៊ឹង សុផារី ២៨.០៥.២០២៤
